એમના ક્રોધ પાછળ કલ્યાણની આવી ભવ્ય ભાવના છુપાવેલી છે એ વાત એમના સાથીદારો આપણને સમજાવી શક્યા નહીં. આપણને તો એટલું જ કહ્યું કે એ સ્વભાવે ક્રોધી અને તોછડા છે ! પણ આપણે હવે જાણીએ છીએ કે એ મૂંગા મોઢે કેવી સતત સેવા કરી રહ્યા છે અને કોને કેવી રીતે મદદ કરતા રહે છે એ વાતની આપણને ખબર જ નથી પડતી ! પોતે મહાન હોવા છતાં પણ આપણી સાથે એ એવી રીતે વર્તે છે કે જાણે પોતે નાના-આપણને મહાન-બનાવવાનો પ્રયત્ન કરી રહ્યા છે ! મધ્યાહ્રનના સૂર્ય કરતાં ઉદય પામતો સૂર્ય વધુ મોટો દેખાય છે. છતાં પણ એનો પ્રકાશ મધુર છે. આપણો પડછાયો એ ખૂબ જ મોટો કરી બતાવે છે અને એ રીતે આપણને સમજાવે છે કે આપણામાં મહાન બનવાની શક્યતાઓ છુપાયેલી છે. એ અને એમના જેવા બીજા બધા મહાપુરુષો ઊગતા સૂર્ય જેવા મધુર છે.