પક્ષીનું બચ્ચું ઊડતા શીખે ત્યારે સ્વાભાવિક રીતે જ ક્યારેક ગડથોલું ખાઈ જાય છે. છોકરીમાંથી સ્ત્રીમાં પરિવર્તન પામતી વ્યક્તિનું પણ એવું જ છે. પરંતુ એવું ગડથોલું તેને આગળ ઊડતા રોકી શકે ખરું ? ઊઘડતા યૌવનની એવી કોઈ ભૂલને પ્રથમ પ્રેમનું નામ આપી શકાય ખરું ? પ્રથમ જાતીય અનુભવ અને પ્રથમ પ્રેમ, બન્ને એક જ હોય એવું દરેક વ્યક્તિના જીવનમાં બને ખરું ? યૌવનમાં પગ મૂકતી છોકરીના જીવન સાથે જકડાયેલી એક સ્થિતિનું આલેખન કરતી આ વાર્તામાંથી ઊઠતા આવા પ્રશ્નોના ઉત્તર વાચકે પોતે જ શોધવા રહ્યા.