દોસ્ત આપણા આયખાને અજવાળે છે. દોસ્તીનું ઋણ કદી ચૂકવાતું હોતું નથી, પણ એના પ્રેમની પહોંચ તો આપવી જ પડે. એમાંય વ્યક્તિ જયારે લેખક - પત્રકાર કે અન્ય ક્ષેત્રના જાહેર માઘ્યમમાં હોય ત્યારે જીગરજાન દોસ્ત વિશે વાત કરે, જાહેર કરે તો દોસ્તીના સંબંધને નવી સુવાસ ફૂટે, દોસ્તના હૈયામાં આનંદના દરિયા ઉછળે. એટલે જ જે દોસ્તોની દોસ્તી જીવવાનું અને જીતવાનું કારણ બની હોય એમના પ્રેમનો આભાર માનવા આ પુસ્તકનું સર્જન કર્યું છે. આ પુસ્તકમાં રણની રેતીને મખમલ કરી ગયેલા કેટલાંક દોસ્તોની વાત કરી છે. અહીં ખભો આપીને આસમાની ટેકો આપી ગયેલા દોસ્તોની વાત છે.